Fréttir

Í lok árs er algengt að fólk líti yfir farinn veg og skyggnist inn í framtíðina og velti  fyrir sér hvert stefni á hinum ýmsu sviðum. Hvert stefnir t.d. í þróun samfélagsmiðla?  Ýmsir sérfræðingar virðast telja að hlutverk þeirra muni enn fara vaxandi og þá ekki bara sem farvegur skilaboða heldur líka sem ritstjórnandi skilaboða og framleiðandi skilaboða og efnis af ýmsu tagi t.d. á myndrænu formi.  Á heimasíðu Alþjóðasamtaka blaðaútgefenda  voru ýmsir sérfræðingar beðnir um að spá í spilin og segja hvert þeir telja þróunina á árinu 2016 í samflélagsmiðlum stefna. Sjá úttekt hér      

 Viðhorf fjömiðla til Donalds Trump, eins frambjóðendanna til að verða forsetaframbjóðandi Repúblikana, hefur tekið miklum stakkaskiptum í vikunni eftir ummæli hans um að banna ætti múslimum að koma til Bandaríkjanna. Þetta birtist m.a. í því með hvaða hætti hann er sýndur eða ekki sýndur í fréttum. Um nokkurt skeið hefur hann verið rammaður inn sem skemmtilegur sérvitringur sem kryddar baráttuna þó hann sé tekin misjafnlega alvarlega. Þannig hefur t.d. Huffington Post um nokkurt skeið sagt fréttir af honum á afþreyingar eða skemmtiefnishluta vefs síns (entertainment), en er nú hætt að dekka hann þar líka á þeirri forsendu að hann hann sé lítið skemmtiefni. Þetta viðhorf er nokkuð dæmigert fyrir þann viðsnúning sem orðið hefur og virðast margir bandarískir miðlar nú líta á Trump sem ógn við lýðræðið. Þannig sagði Tom Brokaw í leiðarapistli á NBC sjónvarpsstöðinni á þriðjudagin að yfirlýsing Trumps væri, „jafnvel nú, á tímum ótrúlegra öfga, hættuleg og gegni gegn straum sögunnar, lögum og grundvallar gildum Bandaríkjanna sjálfra.“ Sjá meira hér  

Hugmyndir stjórnvalda í Noregi um að þrengja mjög skilyrði og möguleika á símasölu hafa valdið nokkrum áhyggjum hjá aðstandendum áskriftarblaða, en þau reiða sig mikið á síka sölu í áskriftarherferðum sínum. Það er ráðherra neytendamála, framfaraflokkskonan Solveig Horne, sem hefur lýst vilja til að koma til móts við kröfur neytendasamtakanna um stífari umgjörð um símasölu.  Sjá meira hér  

Evrópusamband blaðamanna og Blaðamannafélagið í Danmörku hafa fordæmt árás tyrkneskra landamæravarða á danskan blaðamann, Nagieb Khaja, í gær þegar Khaja var að fara yfir landamærin til Sýrlands til að dekka flóttamannamál.  Blaðamannafélags Danmerkur er þegar búið að skrifa tyrkneska sendiherranum  í Danmörku og krefjast þess að rannsókn fari fram á málinu og sama krafa hefur komið frá EFJ. Yfirvöld Í Tyrklandi tilkynntu í dag að rannsókn málsins væri hafin. Kahja var á leiðinni yfir landamærin þegar tyrkneskir öryggisverður stöðvuðu hann og þrátt fyrir að hann hafi gert grein fyrir sér sem blaðamanni þá var hann barinn í jörðina og sparkað  í hann.  Sjá meira hér  

Evrópsku blaðamannaverðlaun hafa nú óskað eftir tilnefningum til verðlaunanna og er tilnefningarfrestur til 18. desember næstkomandi.  Gæði í blaðamennsku eru nauðsynleg heilbrigðu lýðræði og verðlaunin miða að því að hvetja til og draga athyglina að góðri blaðamennsku. Verðlaunin eru veitt í fjórum flokkum og er verðlaunafé í hverjum um sig 10.000 evrur eða tæplega 1,5 milljón krónur. Flokkarnir eru þessir: Verðlaun fyrir framúrskarandi skrif Verðlaun fyrir framúrskarandi umfjöllun Verðlaun fyrir rannsóknarblaðamennsku Verðlaun fyrir nýsköpun eða nýmæli Efni sem tilnefnt er þarf að hafa birst á tímabilinu frá 1. Desember 2014 og 31. Desember 2015 og blaðamenn sem búa og starfa í Evrópu eru gjaldgengir sem og þeir blaðamenn sem starfa fyrir evrópsk fjölmiðlafyrirtæki.  Sjá einnig hér  

Mogens Blicher Bjerregård, forseti Evrópusambands blaðamanna, gerir mikilvægi stéttarfélaga/fagfélaga að umtalsefni í leiðara sínum í nýjasta fréttabréfi Evrópusamtakanna EJF FOCUS.   Hann segir að félög blaðamanna séu í lykilhlutverki við að varðveita til lengri tíma réttindi blaðamanna og vinnuskilyrði og þar með að stuðla að frjálsri fjölmiðlun á svæðinu. Bjerregård segir enn fremur að bæði EFJ og IFJ hafi á umliðnum árum beitt sér kröftuglega í réttindabaráttu blaðamanna í Evrópu og það muni áfram verða gert til að tryggja réttindi, starfsumhverfi og öryggi stéttarinnar. Sjá fréttabréfið hér  

Ritstjórn Framhaldsskólablaðsins, Halla Kristín Einarsdóttir og Sigrún Stefánsdóttir fengu í dag viðurkenningar Jafnréttisráðs á sviði jafnréttismála vegna fjölmiðlunar.  Tilnefningar Jafnréttisráðs voru veittar í þremur flokkum. 1) Til fjölmiðlis sem skarað hefur fram úr á sviði jafnréttismála.  2) Vegna þáttar, þáttaraðar, greinar eða annars afmarkaðs viðfangsefnis. 3) Til einstaklings sem með störfum sínum á fjölmiðli hefur unnið sérstaklega að jafnréttismálum. Framhaldsskólablaðið er sá fjölmiðill sem Jafnréttisráð telur hafa skarað fram úr, en blaðið kemur út ársfjórðungslega.  Í umsögn dómnefndar segir: „Á undanförnum misserum hafa birst langar og ítarlegar greinar og viðtöl um kvenréttindi og femínisma, kynjakvóta, #freethenipple hreyfinguna, kvennasögu og kosningarétt kvenna, kynjafræðikennslu á framhaldsskólastigi, druslugönguna, kynbundið kynferðislegt ofbeldi, réttindi fólks með fötlun, hinsegin fólks og flóttafólks. Framhaldsskólablaðið er öflug rödd í jafnréttisbaráttu samtímans, rödd sem vísar okkur veginn til bjartrar framtíðar.“ Halla Kristín Einarsdóttir fékk verðlaun fyrir heimildamyndina „Hvað er svona merkilegt við það?“  Í umsögn dómnefndar segir að í myndinni segi „frá mikilvægu tímabili íslenskrar stjórnmálasögu og er afbragðskynning og hvatning fyrir þær kynslóðir sem nú vaxa upp og lifðu ekki þessa tíma, og fyrir hina eldri er myndin ekki síður stórskemmtileg upprifjun á merkilegum tímum“. Sigrún Stefásdóttir fyrrum fréttakona og núverandi sviðsforseti hug- og félagsvísindasviðs við Háskólann á Akureyri fékk viðurkenningu fyrir störf í þágu jafnréttis á fjölmiðlum.  Í umsögn dómnefndar segir m.a. að Sigrún hafi átt farsælan feril í íslenskum fjölmiðlum, fyrst sem blaðamaður og ritstjóri og síðar sem fréttamaður, dagskrárgerðarkona og sem yfirmaður í útvarpi og sjónvarpi.  Þá segir að Sigrún hafi lengi fengist við kennslu og að „í kennslu sinni hefur Sigrún ávallt lagt áherslu á að opna augu nemenda sinna fyrir ójöfnu hlutskipti kynjanna í fjölmiðlum. Viðurkenningin var afhent á Jafnréttisþingi en hér má sjá meira um þingið.  

  Áhugaverð umræða um siðareglur og það hvernig blaðamennskan í Evrópu getur endurunnið það traust sem henni er nauðsynlegt mun fara fram í beinni útsendingu á netinu í dag kl 15:00.  Þeir sem munu ræða málin eru Aidan White, framkvæmdastjóri Siðanets blaðamanna EJN (Ethical Journalism Network) og fyrrum framkvæmdastjóri Alþjóðasambands blaðamanna og Randy Picht, forstöðumaður the Donald W. Reynolds  stofnunarinnar um blaðamennsku.   Hægt er að fylgjast með umræðunum í beinni útsendingu annað hvort: Hér á YouTube eða hér á Google Plús   

Í kjölfar árásanna í París s.l. föstudag hefur Evrópusamband blaðamanna vottað aðstandendum fórnarlambanna, þar á meðal blaðamannsins Guillaume B. Decherf og tökumannsins Mathieu Hoche.  Framkvæmdastjóri EFJ, Ricardo Gutierrez segir viðbrögð frönsku þjóðarinnar við hryðjuverkunum aðdáunarverð - þar komi fram að hún láti ekki hræða sig. “Ekki frekar en blaðamennirnir sem vinna allan sólarhringinn við að færa borgurum upplýsingar um þessi voðaverk,” segir hann. Framkvæmdastjórinn segir ennfremur: “Blaðamenn munu ekki láta undan, og rétt eins og í kjölfar árásanna á Charlie Hebdo þá munu blaðamenn halda áfram að verja tjáningarfrelsið en forðast að fara inn á slóðir hatursorðræðu. Það er er sú virðing sem sæmir best virðingu fórnarlambanna.” EFJ segir að ákall sambandsins frá því í kjölfar árásanna á Charlie Hebdo í janúar sé en í fullu gildi en það var eftirfarandi: Hvað ber blaðamönnum að gera?  Andæfa öllum freistingum um auknar njósnaheimildir því blaðamenn vilja ekki samfélag  þar sem persónulegt og félagslegt frelsi okkar er kæft í nafni þjóðaröryggis. Ekki láta ótta eða hatur ná yfirhöndinni. Berjast gegn staðalmyndum og óstaðfestum sögusögnum. Fordæma ógnvænlegar afleiðingar mismununar og misskiptingar meðal fólks. Framar öllu að spyrja í sífellu um siðferðilega ábyrgð okkar sem blaðamanna.  Ricardo Gutiérrez segir um þetta: “Það er á okkar ábyrgð að rækja varðhundshlutverk okkar þrátt fyrir alla erfiðleika sem við kunnum að mæta.”