Matthías Jochumsson(1835-1920)

Matthías fæddist í Skógum í Þorskafirði. Hann þótti snemma bókhneigður, en var kominn af almúgafólki. Þegar hann var kostaður til náms var hann eldri en tíðkaðist um upphaf skólagöngu. 27 ára nemandi í Lærða skólanum í Reykjavík samdi hann Útilegumennina sem voru frumsýndir árið 1862. Hefur ekkert íslenskt leikrit  notið ámóta vinsælda, en endanleg gerð leiksins kom út árið 1898 undir heitinu Skugga-Sveinn. Matthías útskrifaðist sem prestur 1867, þá þrjátíu og tveggja ára. Á skólaárum sínum byrjaði hann fyrir alvöru að skrifa bæði ljóð og leikrit, auk þess sem hann þýddi verk eftir erlenda öndvegishöfunda. Matthías vígðist sem prestur á Kjalarnes, en sagði sig frá embætti eftir að hafa misst tvær eiginkonur með skömmu millibili. Dvaldist hann erlendis um skeið en fyrir tilstilli vina sinna þar keypti hann Þjóðólf árið 1874 og varð  ritstjóri blaðsins um sex ára skeið. Hann sneri sér þá aftur að prestskap, fyrst í Odda á Rangárvöllum og síðan á Akureyri.  Fékk hann síðan skáldalaun frá Alþingi til dauðadags. Matthías var eitt helsta skáld síns tíma, afkastamikill með eindæmum og eftir hann er Lofsöngur, sálmurinn við þjóðsöng Íslendinga.