Markús Örn Antonsson( 1943–)

Markús Örn er fæddur 25. maí. Foreldrar hans voru Anton Björn Björnsson íþróttakennari og Bertha Karlsdóttir hárgreiðslukona.

Markús Örn lauk stúdentsprófi frá Menntaskólanum í Reykjavík 1965. Hann starfaði á skólaárum sem blaðamaður og ljósmyndari á Morgunblaðinu. Hann vann einnig að gerð útvarpsþátta fyrir Ríkisútvarpið 1963 og 1964.

Markús hóf nám við lagadeild Háskóla Íslands haustið 1965 en tók til starfa hjá Sjónvarpinu í desember það ár og vann að undirbúningi að stofnun þess sem fréttamaður og dagskrárgerðarmaður. Hann var við þjálfun í fréttamennsku og dagskrárgerð fyrir sjónvarp hjá ITV í Bretlandi og SVT í Svíþjóð 1966. Markús starfaði sem fréttamaður og dagskrárgerðarmaður við Sjónvarpið 1966–1970 og annaðist umsjón fjölda dagskrárþátta í sjónvarpi og útvarpi.

Hann var kjörinn borgarfulltrúi í Reykjavík í maí 1970. Sat í borgarstjórn 1970–1985. Hann var borgarráðsmaður 1973–1978 og 1982–1985 og forseti borgarstjórnar 1983–1985. Hann var ritstjóri tímaritsins Frjáls verslun og fleiri tímarita hjá útgáfufélaginu Frjálst framtak hf. 1972–1983. Hann átti sæti í útvarpsráði 1978–1985 og var formaður ráðsins 1983–1985. Hann var útvarpsstjóri Ríkisútvarpsins 1985–1991.

Borgarstjóri í Reykjavík var hann 1991–1994. Þá var hann skipaður framkvæmdastjóri Ríkisútvarpsins-hljóðvarps í apríl 1995, og varð aftur útvarpsstjóri Ríkisútvarpsins 1. janúar 1998 og á ný í ársbyrjun 2003.

Markús var skipaður sendiherra frá 1. september 2005 og síðar forstöðumaður Þjóðmenningarhúss sem hann gegndi til starfsloka.

http://is.wikipedia.org/wiki/Mark%C3%BAs_%C3%96rn_Antonsson

https://www.youtube.com/watch?v=j8NUQzphxmE

https://klapptre.is/15-25/?ak_action=accept_mobile

https://www.kvikmyndavefurinn.is/films/nr/1400