Jónas Jónasson(1931-2011)

Jónas fæddist 3. maí. Í drögum að blaðamannatali frá sjötta áratugnum segist hann eiga að baki þrjú ár í gagnfræðaskóla, en ekki lokið prófi, sjö ár í tónlistarnámi, þar af fjögur ár í Tónlistarskólanum í Reykjavík, og fimm ára leiklistarnám. Umsóknin um upptöku í Blaðamannafélag Íslands er dagsett 15. desember 1951 og hann er þá starfandi á Fréttastofu útvarpsins. Hann hafi hafið störf 1. maí 1949 og haft fréttamennsku að aðalstarfi síðan. Meðmælendur á umsókn hans eru Jón Magnússon og Stefán Jónsson, báðir á Fréttastofu útvarps. Í upplýsingum sínum um helstu æviatriði er Jónas frekar spaugsamur eins og hans var von og vísa: „Fæddur í Vesturbænum eins og Hendrik Ottósson, fór í barnaskóla eins og venja er til, en hætti fljótlega og hóf vinnu á Alþingi sem þingsveinn, en hætti áður en ég var kjörinn á þing. Tók fullnaðarpróf eitt hörkugott, utanskóla, en fór að því loknu í gagnfræðaskóla, stóð mig vel í 1. bekk en gerðist latur er á leið. Ritstjóri skólablaðsins og fékk þá áhuga á fréttamennsku, en lesendur misstu fljótt áhugann á mér sem blaðamanni, enda ekki láandi. Hóf nám í tónlist, fyrst í einkatímum, síðan í Tónlistarskóla. Hóf einnig nám í leiklist og hefi stundað nám í þessum tveimur listgreinum, en fljótt á litið virðist ekkert ganga né reka. Það er þó eigi svo, hefi tekið þátt í leiksýningum, fyrst í Iðnó, síðan í Þjóðleikhúsinu, ennfremur leikið í mörgum útvarpsleikritum. Ferðast nokkuð um Norðurlönd og Bretland, hefi kynnt mér vinnubrögð í breskum kvikmyndaverum, einnig séð flutning leikrits á BBC.  Svona standa málin nú, hvað sem síðar verður. Ungur enn að árum og eldist ekki fyrr en annað fólk og get því eigi skrifað meira, þótt allur sé af vilja gerður.“