Jón Hjartarson( 1942–)

Jón Jóhann fæddist 20. janúar á Hellissandi. Foreldrar hans voru Hjörtur Jónsson hreppstjóri og Jóhanna Vigfúsdóttir.

 Hann útskrifaðist sem kennari frá Kennaraskóla Íslands 1965 en gerðist síðan blaðamaður á Vísi og var samþykktur inn í Blaðamannafélagið 1967. Hann sneri sér hins vegar fljótlega að leiklist og lauk leikaraprófi frá Leiklistarskóla Leikfélags Reykjavíkur 1968. Jón var jafnframt við framhaldsnám í Berlín 1984. Hann starfaði um margra ára skeið sem fastráðinn leikari hjá Leikfélagi Reykjavíkur og lék í kringum 80 hlutverk á ferlinum. Jón hefur einnig leikið með ýmsum leikhópum, s.s. Grímu, Litla leikfélaginu, Litla leikhúsinu, Öðru fólki o.fl. Hann hefur enn fremur leikið í kvikmyndum sem og fjölmörgum sjónvarps- og útvarpsverkum.

 Jón hefur samið fjölda leikrita bæði fyrir börn og fullorðna, auk barna- og unglingabóka. Fyrsta leikrit hans, Afmælisboðið, er frá 1969. Hann hefur einnig samið ýmiss konar dagskrár fyrir félagasamtök og stofnanir sem og aragrúa skemmtiþátta, rabbþátta, söngtexta og pistla, eins og segir á bókmenntavefnum.

https://timarit.is/files/14683367

 http://www.mbl.is/greinasafn/grein/695085/