Guðni Þórðarson (1923-2013)

Guðni fæddist 24. maí í Hvítanesi í grennd við Akranes. Hann stundaði nám í tvo vetur í Reykholtsskóla og einn vetur var hann í Samvinnuskólanum. Í drögum að blaðamannatali sem verið var að taka saman á sjötta áratug síðustu aldar kemur fram að Guðni hóf störf á Tímanum 1944 og þegar hann dagsetur inngöngubeiðnina í Blaðamannafélag Íslands 31. desember 1951 hefur hann allan þann tíma starfað á því blaði. Guðni var við blaðamennsku fram yfir miðjan sjötta áratuginn. Hann sótti á þeim tíma í tvígang námskeið í svokallaðri ljósmyndablaðamennsku (photo-journalism), en stétt blaðaljósmyndara var á þessum fyrstu árum Guðna í blaðamennsku tæpast orðin til og þurftu blaðamenn oft að sinna hvoru tveggja, að skrifa textann og taka ljósmyndir til að fylgja lesmálinu. Guðni var einn þessara blaðamanna og varð vegur hans sem ljósmyndara fljótlega ekki minni en blaðamanns. Þjóðminjasafn Íslands hefur haldið nokkrar sýningar á myndum Guðna, en hann færði Ljósmyndasafni Íslands filmusafn sitt 2004-2005.