Elías Mar (1924-2007)

Elías segist fæddur í Reykjavík 22. júlí í drögum þeim að blaðamannatali sem verið var að taka saman á sjötta áratug síðustu aldar, og varðandi skólanám nefnir hann Gagnfræðaskóla Reykjavíkur og Kennaraskólann. Elías er starfandi á Þjóðviljanum þegar umsóknin um upptöku í Blaðamannafélag Íslands er skrifuð og hann kveðst hafa byrjað í blaðamennsku í ársbyrjun 1945. Aðalstarf síðan hafi verið þýðingar og ritstörf. Hann hafi starfað á Alþýðublaðinu  1. janúar 1945 til 30. júní 1946 og á Þjóðviljanum frá 6. febrúar 1953. Umsóknin er dagsett 20. maí 1953 og meðmælendur á umsókninni eru Sigurður Guðmundsson, Þjóðviljanum, og Vilhjálmur S. Vilhjálmsson, Alþýðublaðinu. Um helstu æviatriði segir Elías: „Fæddur í Reykjavík 22. júlí 1924. Stundaði nám í Gagnfræðaskóla Reykjavíkur veturna 1939-1942 og Kennaraskóla Íslands 1942-1944. Vann jafnframt við kennslu og skrifstofustörf og verkamannavinnu á sumrin. Blaðamaður við Alþýðublaðið 1945-1946, hef auk þess þýtt að staðaldri sögur og greinar í ýmis blöð og tímarit. Blaðamaður við Þjóðviljann frá 6. febrúar 1953. Höfundur eftirtalinna bóka: Eftir örstuttan leik (skáldsaga, 1946), Man ég þig löngum (skáldsaga, 1949), Gamalt fólk og nýtt (smásögur, 1950), Vögguvísa (skáldsaga, 1950), Ljóð á trylltri öld (ljóð, 1951). Einnig þýtt skáldsöguna Óveðursnótt eftir Georges Duhammel (MFA, 1951) o.fl. Sat þing norrænna blaðamanna í Stokkhólmi haustið 1946 og þing þýzkra blaðamanna og kennara í Rostock haustið 1951.“