Bríet Bjarnhéðinsdóttir(1856-1940)

Bríet fæddist á Haukagili í Vatnsdal. Hún missti föður sinn um tvítugt og  þegar móðir hennar brá búi fór hún til náfrænda sins, séra Arnljóts Ólafssonar á Bægisá. Þar var góður bókakostur og Bríet þráði að komast til mennta. Hún stundaði skólanám á Laugalandi í Eyjafirði 1880-81 og var það eina formlega skólaganga hennar.  Hún dvaldist í Reykjavík veturinn 1884-1885 og komst þá í kynni við Valdimar Ásmundsson, ritstjóra Fjallkonunnar, sem einn fyrstur manna ritaði um kvenfrelsismál hér á landi og varð litlu síðar eiginmaður hennar. Bríet varð fyrst kvenna til að birta ritgerð á Íslandi, reyndar undir dulnefninu Æsa að hætti tíðarandans, í Fjallkonunni 1885 og til að flytja hér á landi fyrirlestur um hagi og réttindi kvenna sem birtist 1888.  Með eiginmanni sínum stofnaði Bríet Kvennablaðið árið 1895, sem varð mjög vinsælt og náði um tíma mestri útbreiðslu allra íslenskra blaða, og einnig Barnablaðið árið 1898. Saman ráku þau Valdimar talsvert umsvifamikla útgáfustarfsemi allt þar til Valdimar féll óvænt frá fimmtugur að aldri.