Reglulegt samráð við ráðherra menningarmála

Sigríður Dögg Auðunsdóttir, Lilja D. Alfreðsdóttir og Freyja Steingrímsdóttir

Sigríður Dögg Auðunsdóttir, formaður Blaðamannafélags Íslands, og Freyja Steingrímsdóttir, framkvæmdastjóri, funduðu með ráðherra menningar- og viðskipta auk sérfræðinga ráðuneytisins um ýmis brýn hagsmunamál blaðamanna á miðvikudag, 21. ágúst.

Umræðuefni fundarins voru fjölmiðlastefna til ársins 2030, framhald og fyrirkomulag stuðnings við einkarekna fjölmiðla, samfélagssjóður blaðamanna og höfundaréttarmál félagsins svo eitthvað sé nefnt. Á fundinum var tekin ákvörðun um að koma á reglulegu samráði Blaðamannafélagsins og ráðherra svo unnt sé að vinna skipulega að sameiginlegum markmiðum.

Ráðherra lagði fram þingsályktunartillögu um fjölmiðlastefnu og aðgerðaráætlun í málefnum fjölmiðla til ársins 2030 á vorþingi sem fór í kjölfarið í samráðsgátt og verið er að vinna úr þeim fjölmörgu umsögnum sem bárust um málið. Blaðamannafélagið fagnaði fjölmiðlastefnu ríkisstjórnarinnar í  umsögn sinni en bentu m.a. á að hækka þurfi upphæð styrkja til einkarekinna miðla til þess að þeir standist samanburð við hin Norðurlöndin og flýta þurfi lagasetningu um greiðslur tæknirisa renni til fjölmiðla.