Ný leitarvél í gagnagrunni siðanefndarúrskurða

Á þessu skjáskoti af forsíðu úrskurðasafnsins má sjá nýja leitargluggann.

Hinn nýi gagnagrunnur úrskurða siðanefndar BÍ, sem nær aftur til ársins 1998, hefur nú verið betrumbættur: fyllt upp í eyður, tímaröðun úrskurðanna löguð og bætt við sérsniðnum leitarglugga. Er það von félagsins að hér með sé að fullu búið að efna þá ósk sem fram kom á aðalfundi BÍ í vetur um að gera safn siðanefndarúrskurðanna aðgengilegra og notendavænna. 

Allir þeir úrskurðir, fjórtán að tölu, sem bætt var inn í grunninn að þessu sinni, hljóða ýmist upp á „brot“ eða „ekki brot“. Frávísunarmálum var sleppt. 

Auk framangreindra betrumbóta á rafræna úrskurðasafninu hafa hinar nýju siðareglur félagsins, sem samþykktar voru á aðalfundinum 23. mars sl., verið þýddar á ensku.