Valtýr Stefánsson(1893-1963)

Valtýr fæddist á Möðruvöllum í Hörgárdal. Hann stundaði nám í gagnfræðaskólanum á Akureyri, en lauk síðan stúdentsprófi við Menntaskólann í Reykjavík árið 1911. Hóf síðan nám við Landbúnaðarháskólann í Kaupmannahöfn og lauk kandidatsprófi í búnaðarfræðum árið 1914. Síðan stundaði hann framhaldsnám við Landbúnaðarháskólann árin 1915-1917 og vann þá jafnframt við jarðarbótadeild danska Heiðafélagsins. Árin 1920-1923 var hann ráðunautur Búnaðarfélags Íslands og kynntist þannig vel öllum landsháttum. Hann var ritstjóri og meðútgefandi landbúnaðarblaðsins Freys árin 1923-1925. Hinn 1. apríl 1924 gerðist hann ritstjóri Morgunblaðsins, ásamt Jóni Kjartanssyni, og var hann ritstjóri blaðsins um áratuga skeið. Hann varð jafnframt einn af stærstu hluthöfum Árvakurs, útgáfufélags Morgunblaðsins. Valtýr lét víða til sín taka í félagsmálum, var um tíma bæjarfulltrúi í Reykjavík og hann var formaður Skógræktarfélags Íslands árin 1940-1961. Skógrækt var honum jafnan hjartfólgið áhugamál og átti það áreiðanlega þátt í að Blaðamannafélag Íslands kom sér upp gróðursetningarreit í Heiðmörk um 1950. Valtýr var formaður Blaðamannafélags Íslands í tvígang, og var gerður að heiðursfélaga. Í riti sínu Blöð og blaðamenn 1733-1944 segir Vilhjálmur Þ. Gíslasom: „Valtýr Stefánsson tamdi sér nýja grein íslenzkrar blaðamennsku, viðtöl við margskonar fólk um persónuleg og opinber mál,“  segir hann þar, og síðar: „Í öðrum greinum lét Valtýr Stefánsson ýmis stjórnmál til sín taka s.s. í Reykjavíkurbréfi. Hann hneigðist æ meir að því, eftir því að á leið, að stjórnmáladeilur mættu ekki yfirgnæfa efni góðs blaðs.“