Sveinn Sæmundsson(1923-2017)

 Sveinn fæddist 9. apríl á Leirárgörðum í Borgarfjarðarsýslu. Í drögum að blaðamannatali frá því á sjötta áratug síðustu aldar kemur fram að hann hefur sótt nám í kvöldskóla, Iðnskólanum, og skóla í Kanada. Umsókn hans um upptöku í Blaðamannafélag Íslands er dagsett 1. júlí 1956, en hann starfar þá á Tímanum og byrjaði þar í blaðamennsku sex mánuðum fyrr. Um helstu æviatriði skrifar Sveinn: „Fæddur í Leirárgörðum, Borgarfjarðarsýslu. Fluttist á öðru ári til Akraness. Þar til 16 ára aldurs. Var á Íþróttaskólanum í Haukadal. Við ýmis störf unz ég hóf iðnnám í rafvélavirkjun 1942. Lauk prófi 1946. Frá 1948-1954 rafvélavirki á ýmsum skipum Eimskipafélags Íslands. Fór til Kanada 1954 til framhaldsnáms í rafbúnaði skipa. Vann í skipasmíðastöðinni Burrard Dry Dock og stundaði kvöldnám í Vancouver Technical School. Fór þaðan til Þýskalands. Stundaði nám hjá Plat Co. í Hamborg í viðgerðum og viðhaldi Gyro-atlanta. Síðan hjá AEG, sama stað. Lærði þar um sjálfstýringar í skipum o.fl. Kom heim í júní 1955. Hóf  að nýju störf hjá EÍ sem skiparafvirki. Fyrst á Lagarfossi og síðan á Tröllafossi. Hætti þar 23. desember 1955. Réðst til Dagblaðsins Tímans sem blaðamaður 1. janúar 1956.“