Jónas Jónsson frá Hriflu(1885-1968)

Jónas fæddist á Hriflu í Ljósavatnshreppi í S-Þingeyjarsýslu. Hann varð gagnfræðingur frá Akureyri árið 1905, en stundaði framhaldsnám í ýmsum Evrópulöndum, þar sem hann kynntist m.a. lýðháskólahreyfingunni í Danmörku og verkalýðshreyfingunni í Bretlandi. Jónas Jónsson frá Hriflu hefur þótt einhver áhrifamesti stjórnmálamaður Íslendinga á fyrri hluta 20. aldar. Hann átti þátt í stofnun Alþýðusambands Íslands og Alþýðuflokksins 1916 og Framsóknarflokksins árið eftir, var síðar formaður þess síðartalda og afar umdeildur ráðherra dómsmála og menntamála á árunum 1927-1931. Jónas frá Hriflu var helsti forvígismaðurinn um stofnun Tímans árið 1917 og þó hann yrði aldrei starfsmaður Tímans segir Guðjón Friðriksson í Nýjustu fréttum!, sögu fjölmiðlunar á Íslandi frá upphafi til vorra tíma  að enginn hafi skrifað meira í blaðið en Jónas næsta aldarfjórðung. Hafi mátt heyra til undantekninga ef ekki var grein eða greinar eftir hann í hverju blaði á árabilinu 1917-1942, að undanskildum ráðherratíma hans. Jónas skrifaði einnig fjölda greina í önnur blöð og tímarit. „Líklega hefur enginn Íslendingur skrifað eins margar greinar og hann,“ segir Brynleifur Tóbíasson, höfundur Hver er maðurinn?