Jón Eiríksson(1728-1787)

Jón fæddist í Suðursveit í Austur-Skaftafellssýslu  Hann var talinn gæddur óvenju góðum gáfum og tók danski presturinn Ludvig Harboe hann með sér til Noregs þar sem hann var settur til mennta og lauk hann stúdentsprófi frá Niðarósaskóla og lögfræðiprófi frá Kaupmannahafnarháskóla. Hann komst til æðstu metorða í Danmörku og varð m.a. skrifstofustjóri í stjórnarráðinu og hlaut tignartitilinn konferensráð. Hann bar hag Íslands jafnan fyrir brjósti, varð  forseti í Hinu íslenska Lærdómslistafélagi, sem hóf að gefa út rit sín, stundum nefnd Gömlu félagsritin, árið 1781. Hann er sagður hafa ofboðið sér á vinnu og lést sviplega á leið til vinnu, talinn hafa svipt sig lífi með því að kasta sér fram af brú.