Gylfi Gröndal (1936-2006)

Gylfi fæddist í Reykjavík 17. apríl. Foreldrar hans voru Sigurður B. Gröndal, veitingamaður og rithöfundur, og Mikkelína Sveinsdóttir Gröndal. Gylfi lauk stúdentsprófi frá Menntaskólanum í Reykjavík árið 1957 og lagði stund á nám í íslenskum fræðum við Háskóla Íslands. Hann starfaði við blaðamennsku í rúm þrjátíu ár og og ritstýrði m.a. Fálkanum, Alþýðublaðinu, Vikunni og Samvinnunni. Hann gerði auk þess heimildarþætti um mörg skáld tuttugustu aldar fyrir Ríkisútvarpið. Á síðari árum voru ritstörf hans aðalstarf. Hann er þekktastur fyrir viðtalsbækur sínar og ævisögur sem eru hátt í 30 talsins. Hann ritaði til dæmis sögur fyrstu þriggja forseta Íslands og bók um Stein Steinarr í tveimur bindum. Einnig gaf Gylfi út nokkrar ljóðabækur.