Fréttir

Páll Ketillsson ritstjóri Víkurfrétta skrifaði eftirfarandi leiðara í blað vikunnar í tilefni 30 ára afmælis blaðsins: „Gleði, þakklæti og heppni eru orð sem koma upp í huga manns þegar maður lítur til baka yfir þrjátíu ára starfsemi Víkurfrétta ehf. en fyrirtækið fagnaði 30 ára afmæli sl. mánudag 7. janúar. Það er ekki sjálfgefið að fyrirtæki á Íslandi lifi svo lengi en það hefur tekist þó vissulega hafi reksturinn ekki alltaf verið dans á rósum. Á þessum langa tíma í sögu Víkurfrétta hefur gengið á ýmsu í umhverfi fyrirtækja, stór bankakreppa 2008 sem hafði alvarlegustu áhrif á samfélagið í seinni tíð er alls ekki eina áfallið sem hefur dunið yfir. Það voru líka minni kreppur í atvinnulífinu hér á árum áður. Á forsíðu Víkurfrétta í janúar 1983 þegar nýir eigendur tóku við blaðinu voru tvær fréttir um atvinnuleysi. Það er því ekkert nýtt að atvinnumálin hafi verið ofarlega í huga Suðurnesjamanna.Með samstilltu átaki frábærs starfsfólks VF hefur tekist að halda úti útgáfunni en auðvitað með góðu samstarfi við fyrirtæki á Suðurnesjum. Það er ljóst að mannauðurinn í fyrirtækjum skiptir mestu máli, ekki tækin og tólin. Þannig hefur það verið hjá okkur. Margir hafa komið að málum á löngum tíma, vinir, ættingjar og fjölskyldan. En það hafa ekki allir alltaf verið ánægðir og það fylgir því í rekstri fjölmiðils sem nær inn á öll heimili á Suðurnesjum og víðar. Það er ekki alltaf hægt að gera svo öllum líki. Einn dag fyrir margt löngu síðan var upplagi Víkurfrétta úr einu bæjarfélagi hér á Suðurnesjum þá vikuna skilað til baka á skrifstofuna því blaðið hafði fjallað um viðkvæm og erfið mál. Það er ekki auðvelt og kannski ástæðan fyrir því að hægt er að gagnrýna okkur á vissan hátt fyrir að vera ekki með harða rannsóknarblaðamennsku. Það hefur verið okkar stefna að fara varlega. Við búum í litlu samfélagi og við skilum fréttablaði inn á hvert heimili á svæðinu í hverri viku. Því fylgir mikil ábyrgð og það höfum við reynt að hafa í huga. Það má þó ekki gleyma því að fjölmiðlar þurfa að vera gagnrýnir, veita aðhald og halda uppi umræðu og það höfum við reynt að gera eftir bestu samvisku. Því er þó ekki að neita að í fjölmiðlun og blaðaútgáfu hefur ör tækni og þróun haft jákvæð áhrif á reksturinn. Það hefur hjálpað okkur á Víkurfréttum að halda úti stöðugri útgáfu blaðs og síðan fréttavefs. Markmiðið er að gera það eins vel og hægt er. Halda úti öflugri fréttaþjónustu og vera málsvari Suðurnesjamanna. Í erfiðri stöðu atvinnulífsins hefur VF haldið uppi vörnum fyrir svæðið og hvatt stjórnvöld og aðra sem hafa áhrif að gera betur en gert hefur verið. Það er nefnilega víða sem Suðurnesin hafa átt undir högg að sækja í framlögum ríkis, til dæmis til skóla og annarra stofnana og skilning til umhverfis atvinnulífs. Víkurfréttir eru óháð stjórnmálaflokkum en hafa alla tíð haft hagsmuni Suðurnesja í fararbroddi. Víkurfréttir eru á hinn bóginn vissulega háð því hvernig gangi í atvinnulífinu almennt eins og flest fyrirtæki á Suðurnesjum. Við stefnum að því að halda áfram á sömu braut í útgáfunni. Með góðri samvinnu við Suðurnesjamenn hér eftir sem hingað til vonum við að það takist. Sterkur fjölmiðill skiptir svæðið miklu máli. Á þessum merku tímamótum þökkum við Suðurnesjamönnum samfylgdina og samstarfið og vonum að það haldi áfram um ókomna tíð." Páll Ketilsson.

Hjá Víkurfréttum ehf. starfa í dag um tíu manns en fyrirtækið gefur út samnefnt vikulegt fréttablað á Suðurnesjum sem dreift er inn á öll heimili í fyrirtæki í nærri 9 þúsund eintökum. Blaðið fagnar 30 ára afmæli sínu um þessar mundir. Auk prentútgáfunnar eru starfræktir tveir vefir, fréttavefurinn vf.is sem stofnaður var 1995 og golfvefurinn kylfingur.is sem hóf göngu sína 2005. Starfsmenn Víkurfrétta hafa einnig séð um útgáfu tímaritsins Golfs á Íslandi fyrir Golfsamband Íslands í rúman áratug og Páll Ketilsson verið ritstjóri þess síðan 2003. Einnig hafa starfsmenn VF unnið ýmis önnur prentverk og komið að útgáfum að öðrum blöðum. Að sögn Páls hefur reksturinn gengið upp og ofan. „Hann var oft erfiður fyrstu árin en byrjaði að vænkast þegar tölvutæknin kom til sögunar. Það var gott fyrir útgefendur sem áttu ekki sína prentsmiðju. Tölvu- og tæknibylting í umbroti og ljósmyndaþættinum hefur gert starfið mun auðveldara svo ekki sé minnst á netvæðinguna. Rekstrargrundvöllur minni fjölmiðla hefur vænkast á þann hátt að starfsmenn geta gert meira en áður, sérhæfingin minni. Hraðinn er meiri, umbrot auðveldara og tekur minni tíma. Þannig hefur tekist að færa „deadline“ nær prentun sem var mikilvægt. Þannig er hægt að vera með opið lengur fyrir auglýsingamóttöku og það skiptir miklu máli því flestir útgefndur héraðsfréttablaða eru háðir auglýsingum og færri reiða sig á áskrift og lausasölu." Páll segir að með netinu hafi orðið byltingin í fréttamennsku. „Í dag rekum við á VF okkar „dagblað“ á netinu og leggjum mikla áherlsu á góða og öfluga fréttaþjónustu þar. Þróunin í vikublaði hefur orðið þannig að þar eru ekki lengur „nýjustu“ fréttir heldur meira mannlíf og viðtöl/greinar en nýjustu fréttirnar á vefnum. Fyrstu árin birtum við eingöngu efni úr blaðinu á vf.is en nokkrum árum síðar breyttum við því og fórum að leggja meiri áherslu á að nota vefinn sem alvöru fréttamiðil. Í dag er ekki hægt að nætursalta neinar fréttir. Samkeppnin er það hörð og með tilkomu samfélagsmiðla og snjallsíma hefur hún tekið á sig nýja mynd. Gott dæmi um það eru fréttir frá flugdólgi á til til New York nýlega. Þannig varð sá atburður að frétt þegar farþegar tóku myndir og deildu á samfélagsmiðla." Héraðsmiðlar gegna stóru hlutverki í dag, ekki síður en áður segir Páll. „Þrátt fyrir fjölda miðla á landinu þá eru héraðsmiðlarnir að sinna sínu svæði og birta efni sem stóru miðlarnir gera ekki. Við erum meira í nærsamfélaginu. Því er þessi héraðsfrétta fjölmiðlun mikilvæg fyrir landsbyggðina. Í dag er enn fjöldi héraðsfréttablaða og fréttavefja um allt land og sinnir fréttaþjónustu á sínu svæði. Ég tel að framtíð þeirra sé björt og muni aldrei detta út úr fjölmiðlaflórunni." Sigurður Már Jónsson