Fréttir

Athyglisverð umræða fer nú fram í hopi danskra blaðamann í kjölfar þess að viðmælandi blaðamanns hjá Jullands Posten sem fékk sendar spurningar frá blaðamanni birti sjálfur opinberlega svör sín við spurningunum og spurningarnar á opinberri vefsíðu. Það var gert til að tryggja „gagnsæi um ferðakostnað viðkomandi“.   Þetta er nokkuð sérstakt þar sem viðkomandi blaðamaður hefur verið að skrifa greinaflokk um ráðstöfun á fjármagni til rannsókna á sjúkrahúsum og ferðakostnað starfsfólks í tengslum við það. Eitt og annað hefur komið fram í þessum greinum og eftir að blaðmaðurinn, Morten Pihl, hafði komist yfir gögn um ferðakostnað voru fyrirspurnirnar sem sendar voru viðkomandi, rannsóknarkonunni Bente Klarlund Pedersens. En um leið og hún svaraði fyrirspurninni birti hún svör sín opinberlega annars staðar.  Morten Pihl segir í samtali við vefsíðu danska Blaðamannsins að hann hafi talið heiðarlegt að gefa viðmælendum tækifæri til að leggjast yfir svör sín og gefa þau skriflega og að þeir fengju sæmilega rúman tíma til að svara. Nú hins vegar velti hann því fyrir sér – í ljosi þess að eðli málsins samkvæmt séu fjölmiðlar í keppni um að koma fram fyrstir með málin og upplýsingar – hvort þessi vinnubrög séu misráðin og eðlilegra væri einfaldleg að hringja í viðkomandi og stytta tímann þannig fram að birtingu. Hann segir að raunar hafi þetta ekki komið verulega að sök í þessu máli því hann hafi ekki metið þetta sem svo að í málinu væri frétt og eðlilegar útskýringar hafi fengist.   Sjá umfjöllun hér  

Stundum er því haldið fram að fréttnæmir atburðir komi í bylgjum og að suma daga gerist margir mjög fréttnæmir atburðir á meðan ekkert gerist þess á milli. Undanfarin vika á Íslandi hefur verið mjög fréttnæm, eldgos, fjölmiðlafár, og lekamál. Stundum rifja gamalreyndir fréttamenn upp stóra fréttadaga eins og t.d. í janúar 1991 þegar Persaflóastríðið fyrra skall á, Ólafur Noregskonungur dó og Hekla gaus sama daginn.  En um helgina varð einmitt einn af þessum stóru fréttadögum hjá dönskum blaðamönnum og er um það fjallað á vefsíðu Blaðamannafélags Danmerkur. Fréttastjóri TV2, Peter Thorup, talar þar um að þetta hafi verið einn stærsti fréttadagurinn sem hann man eftir, en óvæntar sviptingar urðu í stjórnmálum og í tilnefningum Dana í embætti kommissara hjá ESB sem komu á sama tíma og flóðin urðu í Kaupmannahöfn.  Sjá umfjöllun hér  

Stjórn Blaðamannafélags Íslands samþykkti á fundi sínum í dag 29. ágúst 2014 neðangreinda ályktun: Stjórn Blaðamannafélags Íslands lýsir yfir furðu sinni á að fjársterkir einstaklingar reyni að hafa áhrif á eignarhald á fjölmiðlum í því augnamiði að torvelda umfjöllun um það sem efst er á baugi hverju sinni.  Slíkar tilraunir lýsa mikilli vanþekkingu og skilningsleysi á hlutverki fjölmiðla í samfélögum nútímans sem byggja á lýðræðislegum grunngildum og rétti almennings til að hafa ávallt sem réttastar og bestar upplýsingar.  Leyndin þjónar eingöngu hagsmunum þeirra sem hafa eitthvað að fela og er gróðrarstía spillingar svo sem nýleg dæmi  úr íslenskri samtímasögu sýna því miður svo skýrt.  Blaðamenn og ritstjórnir fjölmiðla munu standa vörð um rétt almennings til upplýsinga hér eftir sem hingað til og hvika hvergi í þeim efnum.  Jafnframt hvetur stjórn Blaðamannafélagsins eigendur fjölmiðla til þess að vera meðvitaðir um það mikilvæga hlutverk sem fjölmiðlar gegna í samfélaginu og þá ábyrgð sem því fylgir að eiga fjölmiðil og skapa starfsfólki hans skilyrði til að sinna hlutverki sínu með trúverðugum hætti. Það er verðmætasta eign hvers fjölmiðils.  

 Sigurjón M. Egilsson nýr fréttaritstjóri hjá 365 skrifar leiðar í Fréttablaðið í dag þar sem hann fjallar um þær hræringar sem verið hafa á fjölmiðlamarkaði og hvernig hugmyndin um ritstjórnarlegt sjálfstæði blasir við honum.  Óbeint virðist tilefnið vera síðasti leiðari Ólafs Stephensen sem greint var frá hér á Press.is fyrr í vikunni.  Sigurjón leggur mikla áherslu á hlutverk blaðamannanna sjálfra og kallar pistil sinn „Er hægt að svíkja sannfæringuna?“  leiðarinn er eftirfarandi:    Er hægt að svíkja sannfæringuna?Það fólk sem velur sér það starf að skrifa fréttir eða annað fjölmiðlaefni er venjulegt fólk. Stundum er í þeim hópi fólk sem er fast á sinni meiningu, fljótt að hugsa og áræðið. Það eru kostir í fréttamennsku. Besta fólkið er fólk sem hefur sóma og þykir vænt um vinnuna, eigið orðspor og eigin æru.Það hefur gengið á ýmsu, hjá nokkrum fjölmiðlum, síðustu daga, ekki síst á þeirri ritstjórn sem ég starfa á og það á reyndar víðar við. Þannig er stundum lífsins gangur.Eitt sker störf við fjölmiðla frá flestum öðrum störfum. Það er sú staðreynd að vinnan er birt opinberlega, hún er öllum aðgengileg. Fréttastofa 365 framleiðir býsn af fréttum, fréttum sem allar eru öllum aðgengilegar án endurgjalds.Til að skrifa allar þessar fréttir þarf margt fólk, fólk sem tekur starf sitt alvarlega, fólk sem fylgir eigin afstöðu í meðferð frétta, sómakært fólk, fólk sem veit að fréttir eru ekki til sölu eða leigu, fólk sem vill með starfi sínu segja fréttir. Sannar og réttar.Ef Reynir Traustason hættir sem ritstjóri DV er ekki þar með sagt að aðgangshörð blaðamennska, í þeim anda sem DV rekur, hverfi. Taki annar ritstjóri við verður eflaust annar blær á blaðinu, kannski verri og kannski betri.Sama er með alla aðra fjölmiðla. Þeir sem stýra hafa vissulega áhrif á það sem þar er unnið og jafnvel hvernig. Einstaka blaðamenn og fréttamenn hafa ekki minna um það að segja. Ritstjóri eða fréttastjóri beygir ekki blaðamenn frá þeirra eigin sannfæringu og fær þá til að skrifa ósannindi, rangindi eða þóknunarfréttir. Það er bara ekki hægt. Ekki gagnvart sómakæru fólki.Þegar skipt er um ritstjóra á fjölmiðli vill oft verða mikil umfjöllun um það. Alls kyns kenningar myndast. Ástæðurnar geta hins vegar verið margar og ólíkar, sem liggja að baki ákvörðun eigenda eða stjórnenda fjölmiðlafyrirtækja þegar ákveðið er að gera breytingar á fyrirtækjunum. Stundum gerist það að afkastamiklir skipstjórar og ágætlega fisknir eru látnir fara. Ástæður þess geta verið margar. Kannski fer viðkomandi ekki nægilega vel með skip eða veiðarfæri eða eitthvað annað. Já, ástæðurnar eru ekki alltaf augljósar þegar ákveðið er að skipta um stjórnendur.Liðna daga hefur á sumum stöðum verið látið að því liggja að á fréttastofu 365 séu óeðlileg afskipti af ritstjórninni. Vilji einhver, eigandi eða annar, hafa áhrif á fréttir eða fréttamenn þarf margt að gerast. Og til að það geti gerst þarf mikið að láta undan. Sumt af því er óhagganlegt, en það er sómi og æra fólks. Fólks sem í þessu tilfelli mætir daglega til vinnu sinnar með sín eigin viðmið, sinn eigin sóma og sinn eigin huga.Eftir að hafa starfað með þessu ágæta fólki í nokkra daga, talað við það og hlustað á hvað það hefur að segja um faglegt mat þess á blaða- og fréttamennsku er ég sannfærður um eitt, og það er það að hlustendur, áhorfendur og lesendur Fréttablaðsins, Stöðvar 2, Vísis og Bylgjunnar, hafa ekkert að óttast. Hér starfar heilt og gott fólk sem tekur starf sitt alvarlega. Fólk með sóma og sannfæringu og það er ekki hægt að svíkja eigin sannfæringu. Það er bara ekki hægt. Sigurjón M Egilsson  

Féttastofa NRK, norska ríkisútvarpsins býr við það að hægt er að kvarta undan umfjöllun miðilsins til sérstaks Útvarpsráðs (Kringkastingsrådet) sem  tekur síðan þessi klögumál fyrir með ákveðnu millibili.  Klögumálin geta verið ýmis kona og á síðasta fundi Útvarpsráðsins lágu tugir klögumála fyrir, langsamlega flest  vegna umfjöllunar NRK  í sumar um átökin á Gaza. Eins og fram hefur komið áður hér á Press.is þá sætti NRK opinberri gagnrýni fyrir að draga taum palestínumanna í fréttaflutningi. Klögumálin voru enda nokkuð að því tagi en eftir að ljóst var að útvarpsráðið fengi mörg slík mál til umfjöllunar bættust við erindi frá aðilum sem hliðhollir eru málstað Palestínumanna og gagnrínir á Ísraelsmenn.  Athygli vekur að sérfræðingar í fréttaflutningi af átakasvæðum voru fengnir til að vera með hugleiðingar í upphafi fundar Útvarpsráðsins, sem átti að auðvelda ráðsfólki að setja sig inn í málið.  Niðurstaðan var almennt sú að NRK fær á sig mjög væga gagnrýni fyrir að hafa ekki í uphafi gert  hlut Hams í átökunum nægjanlega sýnilegan en að öðru leyti hafi vandasöm umfjöllun verið í þokkalegu jafnvægi. Sjá meira hér  

Ólafur Stepensen er hættur sem ritstjóri á Fréttablaðinu. Í eftirfarandi  tilkynningu sem hann sendi frá sér skýrir hann þessi málalok: "Ég undirritaður hef falið lögmanni mínum að tilkynna Sævari Frey Þráinssyni, forstjóra 365 miðla, að ég líti svo á að ráðningarsamningi mínum við 365 miðla hafi verið rift og ég sé óbundinn af honum. Boð um breytt starf hjá fyrirtækinu, sem átti að fylgja ritstjóratitill, fól engu að síður í sér verulega breytingu á verkefnum mínum, starfsskyldum og ábyrgð. Ráðning tveggja nýrra ritstjóra felur það sama í sér. Þá hafa fleiri atburðir undanfarinna daga  á fréttastofu 365, sem ég get ekki tjáð mig frekar um vegna trúnaðar, orðið til þess að ég get ekki litið öðruvísi á en að ætlunin sé að þrengja að sjálfstæði mínu sem ritstjóra, sem kveðið er á um í siðareglum félagsins. Af þessu leiðir að ég mæti ekki til starfa á fréttastofunni á morgun. Ég kveð gott samstarfsfólk með söknuði og þakka því ánægjulega samfylgd".

Ólafur Stephensen, ritstjóri Fréttablaðsins skrifar í dag pistil um ritstjórnarlegt sjálfstæði. Pistillinn er almenns eðlis og fjallar einkum og sér í lagi um áhrif eigenda á ritstjórnir og kemst hann að þeirri niðurstöðu að ef vilji eigenda fjölmiðils standi til þess að hafa áhrif á umfjöllun sé vafasamt að reglur eða lög geti komið í veg fyrir slíkt. Því eigi við í þeim efnum að "valdi hver á haldi".   Tímasetning pistilsins er athyglisverð en hann birtist daginn eftir miklar sviptingar á ritstjórn 365 og staða Ólafs sjálfs á sem ritstjóri hjá 365 hefur í fjölmiðlum verið talin óljós. Sjá grein Ólafs hér

Umtalsverðar mannabreytingar urði í dag á fréttastofu 365. Mikael Torfason hætti sem aðalritstjóri en Kristín Þorsteinsdóttir verður bæði útgefandi og aðalritstjóri og auk þess kemur Sigurjón M Egilsson inn sem fréttaritstjóri. Í frétt á vísir.is kemur fram að óljóst sé enn með stöðu Ólafs Stephensen á fréttastofunni og RÚV hefur eftir forstjóra 365 að engar breytingar hafi orðið á stöpu hans, hann hafi hvorki sagt upp né honum verið sagt upp  Sjá meira hér og hér

„Þetta hryllilega og heigulslega morð á vopnlausum manni er enn ein ástæðan fyrir því að grípa til tafarlausra aðgerða til að verna blaðamenn og almenna borgara fyrir því að vera gerðir að skotmörkum vopnaðra samtaka og hryðjuverkamanna,“ segir Jim Boumelha, forseti Alþjóða blaðamannasambandsins. Hann er hér að vísa í aftöku vígamanna Isis á James Foley sem tekin var upp á myndband og sett á netið fyrr í vikunni. Alþjóðasamba blaðamanna er meðal þeirra fjölmörgu sem hafa fordæmt harðlega þennan atburð.  Sjá meira hér