Undanfarin misseri hefur færst í vöxt að eignarhald á dagblöðum í Bandaríkjunum hafi færst í hendurnar á vogunarsjóðum. Þetta á einkum við staðbundnari dagblöð sem oft eru kennd við tiltekna borg í Bandaríkjunum, sýslu eða jafnvel ríki. Gríðarlegt magn slíkra blaða kemur út í Bandaríkjunum og hafa þau í gegnum tíðina verið helsta uppspretta fólks þegar kemur af fréttum, bæði staðbundnum og á landsvísum. Ekki er langt síðan talið var að um 9000 blöð gætu fallið í þennan hóp. Versnandi rekstrarstaða og viðvarandi fjárhagserfiðleikar hafa gert það að verkum að vogunarsjóðir hafa séð sér tækifæri í að koma inn í eignarhald þessara blaða.
Nýleg skýrsla á vegum hugveitunnar „UNC’s Center for Innovation and Sustainability in Local Media“ reynir að rýna í stöðuna en undanfarið hefur verið talsvert fjallað um þetta vandamál á þeirra vegum eins og sjá má af ritunum; „The Loss of Local News: What It Means for Communities“ og „The Enduring Legacy of Our New Media Barons: How They Changed the News Landscape.“
Fyrri skýrslan fjallar um blöð er lagt hafa upp laupanna og er reynt að rýna í ástæður þess. Þar kemur farm að síðan 2004 hafa hvorki fleiri né færri en 1800 staðbundin dagblöð (e. local newspapers) hætt að koma út. Í öðrum tilvikum hefur fréttaþjónusta blaðanna verið skert svo mikið að nánast er hægt að segja að þau hafi hætt slíkri starfsemi. Í einhverjum tilvikum hafa aðrir miðlar, bæði ljósvaka- og netmiðlar, reynt að fylla í skarðið.