Sagafilm fær Jarðarberið

Vinningshafar ásamt ráðherra og formanni dómnefndar

Umhverfis- og auðlindaráðherra, Guðmundur Ingi Guðbrandsson veitti í dag á Degi íslenskrar náttúru Sagafilm fjölmiðlaverðlaun umhverfis- og auðlindaráðuneytisins.

Dómnefnd skipuð fagfólki úr fjölmiðlum valdi handhafa Fjölmiðlaverðlaunanna en í henni sátu Ragna Sara Jónsdóttir formaður, Kjartan Hreinn Njálsson og Valgerður Anna Jóhannsdóttir.

Var það niðurstaða dómnefndar að veita Sagafilm Fjölmiðlaverðlaunin fyrir sjónvarpsþáttaröðina „Hvað höfum við gert?“ sem sýnd var í RÚV Sjónvarpi. Segir í rökstuðningi nefndarinnar að með þáttaröðinni hafi Sagafilm tekist að setja loftslagsmálin rækilega á dagskrá í íslensku samfélagi. „Í þáttaröðinni, sem er einstök í íslenskri fjölmiðlasögu, er fjallað með grípandi hætti um loftslagsbreytingar af manna völdum; hvernig þessar breytingar munu að líkindum hafa áhrif á samfélag mannanna hér á landi og víðar, en um leið var sjónum beint að því hvað þarf að gera til að draga úr losun gróðurhúsalofttegunda sem og til að milda áhrif þeirra breytinga sem yfirvofandi eru á veðrakerfum og náttúru Jarðarinnar,“ segir í rökstuðningnum. Þannig hafi þáttunum tekist að virkja umhverfisvitund almennings með áberandi hætti.

Verðlaunagripur Fjölmiðlaverðlaunanna nefnist Jarðarberið og er eftir Finn Arnar Arnarson. Er hann í formi krækibers en á því er örlítið Ísland, rétt eins og krækiberið sé hnötturinn eða jörðin.