Kristín hættir á Fréttablaðinu

Þær breytingar hafa orðið í dag á Fréttablaðinu að Kristín Þorsteinsdóttir, sem hefur verið útgefandi blaðsins síðustu ár og þar áður aðalritstjóri, hefur látið af störfum. Samkvæmt upplýsingum höfðum eftir Torgi, útgáfufélagi blaðsins á vef Fréttablaðsins hefur starf Kristínar verið lagt niður í kjölfar breytinga sem orðið hafa á útgáfunni og Fréttablaðið aðskilið frá öðrum þáttum sem seldir voru til Sýnar.  Rekstrarþættir sem áður voru undir útgáfustjóra munu þá færast til framkvæmdastjóra og stjórnarformanns.

Kristín sendir samstarfsfólki sínu kveðju á Facebook og hana má sjá hér að neðan:

"Kæru vinir og samstarfsmenn.

Ég hef unnið minn síðasta dag og skrifað minn síðasta leiðara í Fréttablaðið. Ný stjórn hefur tekið við með nýju fólki og nýjum áherslum.

Í rúm 5 ár, lengur en nokkur annar, stjórnaði ég fréttastofu 365 sem aðalritstjóri og útgefandi - þá stærstu fréttastofu landsins - og svo Fréttablaðinu eftir að fyrirtækinu var skipt upp, síðustu mánuði hef ég verið útgefandi. Þar áður sat ég í stjórn 365. Flestar kennitölur miðlanna, sem ég stjórnaði vitna um góðan árangur. Fréttir Stöðvar 2 náðu að velgja keppinautnum undir uggum - oft vorum við með meira áhorf en RUV, visir.is komst í fyrsta skipti yfir mbl.is undir minni stjórn, við gerðum frábæra hluti með nýjum áherslum og útliti Fréttablaðsins. Við breyttum skipuriti fréttastofunnar og gerðum hlut kvenna meiri en nokkru sinni. Um tíma voru flestir yfirmenn konur og stundum voru vaktirnar eingöngu skipaðar konum.