:::PRESS.IS:::

Alþjóðasamband blaðamanna (IFJ)hefur sent frá sér yfirlýsingu þar sem segir að albönsk stjórnvöld hafi gróflega gengið gegn fjölmiðlafrelsi vegna þess að dómstóll í höfuðborginni Tiranna hafi úrskurðað að greiða beri 400 þúsund evera miskabætur vegna fréttar sem var niðurstaða rannsóknarblaðamennsku með falinni myndavél.  Ráðherra, sem nú er fyrrum ráðherra, var staðinn að því að heita ungum konum atvinnutækifærum gegn kyngreiðum. Ylli Pango, fyrrverandi ráðherra mennta-, menningar, og ferðamála var afhjúpaður í fréttaþætti sjónvarpsstöðvar þegar sýnt var myndskeið sem tekið var með falinni myndavél af blaðakonu sem þóttist vera atvinnuleitandi og fékk frá honum vilyrði fyrir góðri stöðu gegn því að hún gerði honum kyngreiða. Fréttin kom í kjölfar umræðana og ásakana um að ráðherrann ætti í kynferðissambandi við konur á vafasömum fosendum. Í ljós kom að þær sögusagnir áttu við rök að styðjast.

„Þessi úrskurður dómstólsins er nánast eins mikið hneyksli og þær siðlausu athafnir sem afhjúpaðar voru í þessari frétt,“ segir Aidan White framkvæmdastjóri IFJ. „Þessi dómur má ekki standa óhaggaður og honum verður að áfrýja,“ segir hann ennfremur.

Dómsniðurstaðan byggði á þeim rökum að með því að afla upplýsinganna með falinni myndavél og á fölskum forsendum hafi persónuvernd ráðherrans verið vanhelguð og því bæri sjónvarpsstöðinni að bæta fyrir þann miska.   Alþjóða blaðamannasambandi segir að þessi niðurstaða - fengi hún að standa - myndi takmarka mjög verulega möguleika fjölmiðla til að beita ýmsum aðferðum rannsóknarblaðamennsku og þannig sinna hlutverki sínu og veita stjórnvöldum eðlilegt aðhald. Einnig er það skoðun Alþjóða blaðamannasambandsins aðþessi niðurstaða gangi gegn því sem Mannréttindadómstóllinn í Strassborg áður dæmt í sambærilegum málum.